RAAT

Dhuaan dhuaan si guzarti ye gehri kaali raat, 

phir ek subah ki talaash mei jawaan ho chali h

Khamoshi ko hawaao ke shor mei chupaye, jaane kitni kahaniya bayaan kr chali h

Liye veeraniya apni palko mei, bhari kadmo se be-aahat chal padi h

sunehri kirano ki garmaayi mei khud ko sametne ki khwaahishei liye, 

sard ehsaaso se lathpath apni rooh ko kuch pal sukoon ke dene,

wo kaali andheri sard raat, haan, aaj phir, uss neeli subah ki panaaho ko dhoond-ne nikal padi hai

Sukoon??

ghar ki khidki toh maine iss sukoon mei kholi thi ki shayad ab hawaye badalne lagi hongi,

magar haath mei aaya wahi neeli syaahi sa pighalta hua aasman,

dikhe to sirf ghar wapas jate kuch sehme se parinde,

aur mile to kuch nanhe se jugnu apni hi roshni se bekhabar ujaalo ki talaash mei anjaan andhero mei gum..

Ichchaayei

kabhi zindagi ki zaroorat thi mujhko, to kabhi maut ko aarzoo thi meri...

kabhi bandigi ki koshish ki maine, to kabhi khuda ko hi hasrat hui meri...

har pal mai maut ko daga deta raha, aur har lamha mujhe zindagi ne bewafai di...

zindagi ke har ehsaas mei katl-e-aam hota raha, aur maut ke har khayal ne jeene ki farmaaish ki..

Hissa

Kabhi Khoobsurat se afsaano mei yu guzarti si zindagi, 

kabhi daraavane se kuch khayalo mei ubharti si wo bandigi...

Na unn palo ka suroor sada rehta hai, na inn lamho ka hisaab koi rakhta hai...

kuch lamho mei dhundlay hote afsaane aur Kuch palo mei ghehraatay hue khayal... 

bas yahi hai jo yaha tera mera hissa hai..

Mulakaat

adhoore si raat mei adhoori si baat hai... adhoore se lavz h, adhoori mulakaat hai...

yaha manzilo ko paane ki milti hai nishaniya adhoori aur ehsaas ke bina rehti h kuch tanha viraan si kahaniya adhoori...

karne ki chaah mei adhoore se kuch khwaabo poore... yuhi reh jaate hai, kuch tum adhoore kuch hum adhoore...

Koshish

Hatheli bhar khwahishei, thodi si sachchai.... kuch tukda aasman, thodi si gehrai...

kuch dhool khaati tasveeray, Kuch banti bigadti takdeeray... kuch paer mei lipti zanjeerein, kuch oonchi udti tarkeebein...

inn lamho mei unn khwaabo ko paane ki phir koshish karna.... thak jana aur gir jana par uth ke phir se hadd karna...

sab kuch toh h tere paas mei, phir tu h kiski talassh mei... ruk ja thoda, tham jaa thoda, kuch saans to aaye ssans mei...

yun hi

kuch khayal, kuch fasaane.. thodi haqiqat, thode afsaane...

jeevan ki iss kitaab mei na jaane kitne kissay hai.. thode mere apne, thode hai anjaane

Aarzoo

Der raat kuch fadfadaate pankho ki awaaz se meri need khuli to dekha.... kuch nanhe panchi betahasha udte chale ja rahe thay...

maine poochha toh bole ki savera hone mei der na ho jaye isiliye uski taraf khud hi badhe ja rahe h...

kitni ajeeb si thi unki masoom udaano ki daastaan... thodi haqiqat se lathpath aur thodi armaano se lahu-luhaan...

kuch nazre dhassti hui zameen pe tikaye.. aur kuch pankh uss girte hue aasmaan ki taraf khole...

ab bhi subah ki taraf wo badhte hue nazar aate h.. bekhabar, anjaan apni hi duniya mei pasri veeraniyo se...

Aashanka

woh jo khud meri nayi shakhsiyat ban sa chala h... phir kyu mere parivartan se pareshaan ho chala h...

woh jiske pehlu mei aake safar ko mukaam mil gaya... phir kyu kuch kadam dheeme chalne laga h..

ek thehraav woh, musaafir mai, phir aage chal padunga... kyu inn afsaano ko woh sach maan chala h...

kyu ye parde haqiqat ke paardarshi h itne ki saamne ho kar bhi apni maujoodgi darz nahi karate..

Aur kyu yakeen hota bhi h ussay toh sirf anmani aashankaao pe... Jinke maayne ek kshan-bhangur se jyada nahi.

Ummeed

Zameen pe bikhri ret ko ek khayaal jo mann mei aya, toh thaam hawa ka haath wo udd chali oonchaaiyo ko chhoone...

nadiyo mei chhitki boondo ko ek sawaal jo mann mei aaya, toh ubal ke sooraj ki garmi mei chal padi baadalo mei ghulne...

na chhora jo ret ne hawa ka saath toh palat ke bawandar ka bhi roop dhar liya..

aur kiya jo boondo ne baadalo ka bharosa toh ban ke toofaan bijliyon ko nigal liya..

ye kissa nahi taaqat ka, ye kahani nahi himaqat ki, yaha charcha nahi aadat ka, ye afsana nahi zaroorat ka...

ye baat hai ummeed ki, jazbo ki, vishwaas ki... ek ehsaas ne jinke katre ko bhi hasti mei badal diya.

Vishwaas

aaj h vishwaas h, yaha kal ki kisko aas h, ek pal mei poori zindagi banti yunhi itihaas h...

ab shaam h phir raat h, subha ki kisko talaash h, jab raat bhar mei zindagi bhar leti poori saans h..

teri baaho ke inn gheron mei yaha sabne manzil payi h, Ae maut ye teri kismat h ke bas Anth mei hi tu aayi h..

zindagi ko yaha pe har koi seene se laga ke rakhta h, par fitrat  h saanso ki ye yaha sabse ki bewafai h...

phir bhi ye kadam ne tham-te h, na rukte h, na mudte h.. ye bhi ek sach h jeevan ka, ye bhi ek Ras h jeevan ka..

Toh darr kaisa aur aankh kyu nam, zindadili tu na karna kam, andaaz yehi h bas jeene ka, ki khush rehta ja na karna gham... Hardum!! Hardum!!

Bhram

baadlo ki tarah aakaar badalti ye zindagi, har pal jaise ek naya hi roop hai..

kuch khilkhilati subahei kuch tanha si shaamei, kabhi syaah andhera to kabhi chilchilti dhoop hai...

faila kar baahein issay gudgudana jo chaha, to paya issay ghaney kohrey sa khokhla...

jiska nazaara hai behad khoobsoorat par har ehsaas sard hai..

Poorak

bandh darwaazo ke baareeq suraakho se aati roshni ka kissa tha, ye roshni ka wo tukda tha jo andhere kamro ka hissa tha...

koshish thi roshni ki andhero se guzarkar ussay ujaalo mei badal de, aur andhero ki ye hasrat thi samet le panaaho mei aur roshni ko nigal le...

na kusoor roshni ka tha na gunaah tha andhero ka...

ye toh bandh darwazo ki haqiqat thi... ki na roshni ko andhero ki viraaniyo ka ehsaas hone dia aur na andhero ko roshni mei chhupe sannate ka...

Top of Form

Aabhaas

uss samunder ke kinaare ek ret ka teela tha, uss ret ke teele par wo insaan akela tha... 
nazrein tha dur tak tikaaye, jaise cheekhti si aankhei lehro mei sannaatei dhoond rahi ho...

saans thi chalti thodi maddham, jaise zindagi ki bhaag daud mei kuch aaram le rahi ho...

dheere dheere dhastei paanv, ret ke paaniyo mei mil jaane ka lutf le rahe thay... shayad oonchi udaano se thak kar zameeno ki gehrai naapne lagey thay..

wo lehrie jaa takrai chattaano se, paani ko kaanch sa toot ta aaj pehli baar dekha tha...

phir kyu ye sab aaj naya sa laga, itna zinda, bachpan sara yahi to guzra tha... kuch der aankhei moond jo thandi hawa ko suna, to mano zindagi ki kitaab ek pal mei bayaan ho gayi...

kyu wo khud se hi bhaagta rha, kyu wo bebaat hi kaampta raha,
kis cheez ke liye kudrat lo takkar deta hai aa raha...

aaj kudrat ki baaho mei khud ko khud se azaad kiya to jaana, ki zindagi yuhi jannato ki chaaho mei di gavayi, aur waha jannatei meri raaho mei kahi leti rahi angdaai.