Monday 27 June 2016

Baaham

Tu dhoop samandar pe, mai paani gehra hu, tu raat hai banjar si, mai tera savera hu

Tu balkhaati nadiya, mai jungle ghanera hu, tu hawaa ka ek jhonka, mai phool sunehra hu

Tu parvat sa ziddi, mai tera rasta hu, tu baadal sa ooncha, mai baarish mei rehta hu

Tu pankh udaano ko, mai hausla tera hu, tu jad hai dharti mei, mai ban ban bel bikharta hu

Tu rimjhim si hai barsaatei, mai jharne sa tujhse banta hu, tu ruki hui chattan koi, tujh par hi aake rukta hu

Mai ambar sa tujhe takta jata, tu dharti si hai khilti jaati, tujhse se hi shuru, tujhse hi khatam, meri duniya gol hui jaati