Sthiti

Kuch sapne kuch khwaahishe, kuch neende kuch koshishe

Wo raat ki baarishei, wo dhoop savero ki,
Wo hawaayei deti raahatei, wo aasmano ki aahatei

Wo chham chham krti badhti nadiya, wo aaghosh samundar ke, wo jalta sooraj garmi mei, waha chaand jo deta thandak hai

Unn pedo pe patte hare bhare, uss ghaas mei lipti patjhad hai, wo nanhe bachhe ki kilkaari, jhoolo mei kitni hulchal hai

Ek tu baitha hai dur waha, aur mai hu parvat sa ruka hua, ek tu hai rasto ki manzil sa, ek mai hu kshitij pe khada hua

Aa mil ja aur poori kar de inn sab ki khaali ye tasveer, ki poore ab ye nazaare ho aur tasveero mei rang bhare,

iss kadar range tere rang mei sab, har su yaha bas tu hi ho aur tujhme simta hua mai kahi

Chaadar

Thak jaati aankhen meri teri hi raah takte takte, kya jaane kis mod pe tu hai kya jaane kis ghadi mei tu

Waqt ka pahiya chalta jata, aankein ektak ruki hui, ghadi ko dekhu mud mud ke mai, kya jaane kaha sui ruki

Tujh bin veeraan si raato mei mai odh mohabbat ki chaadar, karta hu andhere dur yaha, deedaar ko tere diye jala kar

Na thand lage na pyaas mujhe, mai ashqo ko pee leta hu, uss chaadar ko see leta hu

Wo chaadar ek mohabbat ki, jise liye phira mai sadiyo se, jism mei jiske chhed hue, mausam ki badalti neeyat se

Bas badhta hu har pal tujh tak, maine mausam ka rukh mod diya, iss chaadar ko seete seete, ye bhi ek hunar maine seekh liya

Ab aana hai teri galiyon mei, uss sard raah pe chalte hue, apne kaandhe pe tera sar rakh ke, uss chaadar mei tujhe apne sang, chhipa ke phir le jana hai

Le jau tujhe phir dur waha, jaha koi na ho tere mere siwa, jaha mausam na badle neeyat, jaha thandak thodi meethi ho

Aur uss chithdi hoti chaadar se tambu ho bana armaano ka, sukoon ke naye mehmaano ka